Alltaf er þetta bankahrun að þvælast fyrir íhaldinu

Ekki held ég stöðu minni sem froðusnakkur án þess að hella reglulega úr skálum reiði minnar yfir lyklaborðið. Það hef ég ekki gert lengi og því hef ég alls ekki innistæðu fyrir því að sleppa þeirri óskrifuðu reglu meðal froðusnakkara að missa stjórn á mér vegna landsdómsmálsins. Hér eru því nokkrir punktar, í samhengislausu samhengi.

Sjálfstæðismenn fara eins og við var að búast skemmtilegar leiðir til að rökstyðja mál sitt. Áður en ég fer í málflutning varaformannsins Ólafar Nordal má ég bara til með að fara í smá upprifjun. Ólöf Nordal missti útúr sér skoðun sína á skýrslu RNA í hinum merka íhaldsþætti Hrafnaþingi. Sjálfstæðismönnum líður þar (eðlilega) bara eins og heima í stofu, umkringdir skoðanabræðrum í notalegu spjalli og það eina sem vantar er rauðvínið. Þess vegna kemur stundum hinn óritskoðaði, pólitískt rangt þenkjandi íhaldsmaður óvart þar fram í þættinum. Ólöf sagði og ég veit að ég er bloggari nr. 5.000 að ítreka þetta, en þetta er bara of gott til að þetta sé ekki rifjað upp reglulega:

Þessi rannsóknarskýrsla og þetta allt saman er að þvælast eitthvað fyrir okkur tímabundið. 

Daginn eftir kom hin ritskoðaða og pólitískt rétt þenkjandi Ólöf Nordal fram og sagðist auðvitað sjá eftir þessu.  Einhverjir keyptu sjálfsagt þá skýringu, en ekki ég, enda var tónninn einfaldlega svo einlægur heima í Hrafnaþingsstofunni að hún gleymdi að myndavélin var í gangi og einhver að horfa.

Nú er nýjasta hraðahindrunin á leið Sjálfstæðisflokksins til æðstu metorða á ný þessi hugmynd að ákæra fyrrverandi ráðherra fyrir Landsdóm. Það finnst Ólöfu fráleitt meðan þeir ganga enn lausir sem ollu hruninu.  Þessi punktur vakti athygli mína enda kunnugleg málsvörn.  Bíddu við, hver tók aftur svipaðan pól?  Það var ekki amalegri fyrirmynd fyrir Sjálfstæðisflokkinn heldur en fyrrv. stjórnarformaður Kaupþings, Sigurður Einarsson!  Honum svíður mikið að verið sé að eyða tíma í Kaupþing á meðan ekki er búið að hefja sakamálarannsókn á Icesave reikningunum.  

Ekki skal ég skera úr um forgangsröðun þeirra sem rannsaka þennan stóra skítahaug. En mér finnst vert að taka þennan forgangslista réttlætisins, útdeilt af Sigurði Einarssyni og Sjálfstæðisflokknum til frekari skoðunar. Maður sem beitir hníf í líkamsárás og stingur í læri hlýtur til að mynda að eiga skýlausan rétt á frestun síns máls meðan alvarlega mál annars manns sem stakk fórnarlamb í brjóstkassa er leitt til lykta. Svona mætti lengi halda áfram í ómálefnalegum samlíkingum ef menn vilja.

Fleira skemmtilegt hafa íhaldsmenn sagt. Ólöf og Siggi Kári tala um að næg refsing fyrir ráðherrana sé að fá svona slæma umsögn í skýrslunni og sú staðreynd að þau eru ekki lengur (utan Björgvins sem er í leyfi) þingmenn/ráðherrar í dag. Með útúrsnúningi má því segja að ef aðalgjaldkeri fyrirtækis yrði uppvís af fjárdrætti væri næg refsing fyrir hann að missa starfið og að um málið yrði skrifuð frétt á innraneti fyrirtækisins.  Jæja, hendum jafnvel inn frétt á baksíðu Moggans um aðalgjaldkerann líka til að fá fullkomna útrás fyrir refsigleðina!

Ég veit ekki hvort þessir fyrrv. ráðherrar eru sekir eða saklausir um vanrækslu. Ég treysti hinsvegar Rannsóknarnefnd Alþingis svo miklu miklu betur en Ólöfu Nordal og Sigga Kára til að fjalla um það (sjá kafla 21 í skýrslunni).   Það er hart að vera ákærður fyrir Landsdóm og sér í lagi þar sem sumir pólitíkusar hugsa að því er virðist meira um dóm sögunnar frekar en samtímans. En það er líka grafalvarlegt mál fyrir þolendurna að viðkomandi hafi tekið að sér ráðherraembætti og sýnt af sér vítaverða vanrækslu ef marka má skýrsluna. Leita ekki aðstoðar AGS mun fyrr þegar augljóst er að stjórnvöld hafa algjörlega misst tökin á efnahagsmálunum, hlusta ekki á viðvörunarorð og leyfa Landsbankamönnum að opna sparireikninga í nýjum löndum fram að síðustu mínútum kerfisins eða því sem næst.

Mín kenning er þessi og hún er ekki síst í boði Hrafnaþings-Ólafar: Sjálfstæðisflokkurinn vill ekki kæra ráðherrana af þeirri einföldu ástæðu að þá mun enn á ný fara fram krufning á því hver ósköpin þeirra fólk var að gera, eða öllu heldur, ekki gera!  Þau vilja ekki að þetta mál þvælist fyrir lengur og því er best að kæra engan og segja bara bless sem fyrst við þessa óþægilegu skýrslu!

Athugasemdir

[Helena Eydís (IP-tala skráð) 21.9.2010 kl. 23:17]

Dásamlegust af öllu finnast mér rök þeirra sem vilja ekki að fjórmenningarnir verið ákærðir af því að hinir sem voru við stjórn á undan sleppa þar sem ráðherraábyrgð þeirra er fyrnd. Sem sagt að það á að sleppa því að refsa þeim af því að á undan voru einhverjir sem gerðu eitthvað verra og þeir sluppu. Þetta er svona álíka og ef við mundum bæði keyra of hratt en þú mundir sleppa af því að löggan var ekki mætt á svæðið þegar þú keyrðir of hratt. Þá ætti ég auðvitað að sleppa líka út af því að þú slappst.

Góður pistill annars - endilega rasaðu sem oftast út á lyklaborðinu :) 

[Röðull Reyr Kárason (IP-tala skráð) 22.9.2010 kl. 01:52]

Enn og aftur eru fulltrúar okkar að tuða um sig sjálfa. Minnir mig stundum á hóp aðdáenda einhvers lið í englandi sem vill sjálfir ræða, "rökræða" og dæma í því hvort þeirra lið hafi virkilega gerst brotlegir innan teigs. Sama hvaða ákvörðun dómarinn hefur svo tekið þá eru hinir á moti og aðrir á móti allt eftir því hverjum er með haldið....kallað "fótboltablinda"

það er ekki að ástæðulausu að ég hef líst pólitík vinstri manna og hægri sem sama og að ræða við stuðningsmenn liverpool og man utd...m.u. geta ekki líst aðdáun á gerrard né lfc á rooney...þó báðum innst inni langi það, amk að hafa andstæðingin í sínu liði.

af hverju eru þeir að tala um sín eigin brot (amk fólks í eigin flokk)...látum hæstarétt fá þetta og látum fulltrúa okkar leysa vandamálin OKKAR..

FARIÐ AÐ HUGSA UM OKKUR en ekki flokksystkini

annars þokkalegur pistill...hrafnaþing er besti þáttur í heimi ef maður vill verða mjög...MJÖÖÖÖÖÖÖÖÖÖÖÖG reiður.

áfram valgerður

[Magnús Halldórsson (IP-tala skráð) 22.9.2010 kl. 09:35]

Þetta er stórkostlegur pistill Karl.

Hvaða skoðun sem menn hafa á því, hvort ákæra eigi ráðherra eða ekki, þá virðist sem naflaskoðun flokkanna sé að snúast upp í allsherjarbrandara frammi fyrir almenningi.

Enginn stjórnmálamaður virðist kannast við það að bankakerfið hafi stækkað 12X umfram landsframleiðslu á grunni minnsta gjaldmiðils í veröldinni. Þess eina sem aðeins er hægt að lána út verðtryggt, með fullkomlega glórulausum vöxtum.

Stóra planið - að búa til alþjóðlega fjármálamiðstöð á Íslandi - er eitt og sér hugsanlega refsiverð heimska. Svona þegar maður pælir í því.

kv

MH

[Hlynur Gudlaugsson (IP-tala skráð) 22.9.2010 kl. 12:35]

Flottur pistill hjá þér og mjög málefnalegur.

Sjálfstæðismenn eru ótrúlegur þjóðflokkur en alvarlegast finnst mér þegar c.a. 35% af þjóðinni eru ennþá tilbúin að kjósa Íhaldið þrátt fyrir gjaldþrot heillar þjóðar á þeirra vakt. Það vekur furðu mína og sjálfsagt margra sem sýnir í hvaða farvegi pólitíkin er á Íslandi. Pólitíkinni hefur aldrei verið fórnað á altari réttvísinar fyrir hagsmuni almennings og nýjasta útspilið hjá Samfylkinguni segir okkur að það á ekkert að breytast.

Ekki ætla ég að bera blak af verkum núverandi ríkisstjórnar og finnst agalegt hvað erfitt er að koma einföldum málum í gegn, eins með sanngirnissjónarmið í gengislánum sem stjórnvöld hefðu geta komið að ef vilji hefði verið fyrir.

Það á að fara með málið alla leið fyrir Landsdóm ef það eru góðar líkur að sakfelling náist eins og lögfróðir menn hafa sagt. Líka til að sýna fordæmi... að ef þú drullar upp á bak í embætti að þá verður þér refsað. Menn hafa þá kannski vit á að segja af sér embætti ef þeir treysta sér ekki í verkefnið en hingað til hefur þurft byltingu til að fólk hreinlega hafi vit á að drulla sér í burtu.

Flottur pistill

[Karl Hreiðarsson, 22.9.2010 kl. 18:31]

Þakka hlý orð og góða punkta, held ég gæti skrifað undir nánast hvert einasta orð hér að ofan!

[Heiðar Birnir, 22.9.2010 kl. 20:09]

Þetta vildi ég sagt hafa.  Takk, helv. góður pistill hjá þér Kalli.

[Anna Sigríður Guðmundsdóttir, 22.9.2010 kl. 21:22]

Takk fyrir Karl!

Nú verðum við að halda fókusnum á sannan raunveruleikann og láta ekki glepjast í auglýsinga-fári ræningja Íslands (D)! þeir (D) vita nefnilega að með nægum peningum er auðvelt að blekkja og kúga: örvæntingarfullt, svikið, niðurbrotið og rænt fólk!

Og hverjir stóðu fyrir svikunum og ráninu í raun síðustu áratugina? D-auðvalds-klúbburinn!!!

Látum ekki þjófa glepja okkur! 

M.b.kv.