Hræðsla fullorðins manns

Fimm lykiláhættur hef ég óttast í lífinu til þessa:
1. Endajaxlatöku
2. Manndrápsflugur sem stinga (geitungar, randaflugur og aðrar sambærilegar skaðræðisskepnur)
3. Kríur (ógnandi skepnur með skeinuhætt öskur)
4. Mikil hæð (allt yfir tveimur metrum)
5. Sigríði Klingenberg galdrakonu

Þrátt fyrir að þetta útskýri sig auðvitað allt sjálft væri bloggið ansi rýrt ef ég myndi ekki fara aðeins betur í hvern lið en til að útskýra svona grundvallarmál dugar ekki annað en langhundur.

1. Endajaxlatökuna hef ég forðast og frestað eins og ég mögulega hef komist upp með síðustu 7-8 ár.  Ástæðan var í upphafi einföld, fjárhagsástæður en undir niðri kraumuðu aðrar og myrkari ástæður.  Stórkostlega bólgnar systur mínar komu heim frá Akureyri fyrir tæpum 20 árum úr slíkri verkun og síðan þá hef ég þefað uppi sögur af blóði drifnum endajaxlatökum. 

Í ljósi þess hvað kona mín hefur gengið í gengum síðastliðið ár án þess að kvarta nokkuð fannst mér ekki sérstaklega karlmannlegt að fresta þessu lengur þannig að ég lét fjarlægja alla fjóra í einu fyrir mánuði síðan.  Það var sáraeinfalt enda tannlæknirinn snillingur.  Kannski var ekki ástæða til að kvíða fyrir þessu áralangt.

2. Manndrápsflugurnar hafa lengi elt mig uppi og eingöngu einu sinni náð árangri við árás, ég lifði þó naumlega geitungastunguna af.  Hunangsflugur eru sagðar meinlausar en ég veit betur, undir sakleysislegu yfirbragði leynist þaulæfður fjöldamorðingi. 

 

 

3. Kríur eru fallegir fuglar en leiðinlegri skepnur eru vandfundar.  Óþolandi hávaði í þeim og hegðun þeirra ekki til fyrirmyndar.  Síðan eru þær stöðugt að gera árásir á heila okkar mannfólksins og reyna bannvænar stungur við flest tækifæri.

 

 

4. Lofthræðsla er afar eðlileg enda rökrétt að hafa fast land undir fótum og vera ekki að storka örlögunum með öðru.  Verst þykir mér hve lofthræðslan ágerist með aldrinum og væntanlega endar hún með því að ég þori ekki uppá tábergið um fertugt.

 

 

5. Ekki veit ég af hverju ég fór að vera hræddur við Sigríði Klingenberg.  Líklega byrjaði það þegar ég rakst á hana á förnum vegi og hún með sína hæfileika og þetta furðulega hár virtist líkleg til að breyta mér í kommúnista með einhverjum nornaálögum ef ég liti einkennilega á hana.  Ég heyrði svo viðtal við Sigríði í besta útvarpsþætti landsins nýverið, Kvöldgestir m. Jónasi Jónassyni (sem er nota bene langbesti útvarpsmaður landsins, mæli með podcastinu) og viti menn, Sigríður er ekki á nokkurn hátt ógnvekjandi eða líkleg til galdramennsku.  Jónas er auðvitað meistari í að laða það besta fram í fólki en ég treysti mér alveg til að mæta henni á götu í dag og jafnvel bjóða í kóksopa.  Síðan gerði hún mér og veislustjórum í brúðkaupi góðs fólks nýverið mikinn greiða fyrir hálft orð þannig að hún er í miklu áliti hjá mér í dag. 

 

Dágóður árangur að ná að skjóta niður 2 af 5 á nokkrum vikum, ætla mér þó næstu 5 ár í að vinna í hinum þremur málunum en listinn getur alveg óhikað litið svona út í dag!

1. Endajaxlatöku
2. Manndrápsflugur sem stinga (geitungar, randaflugur og aðrar sambærilegar skaðræðisskepnur)
3. Kríur (ógnandi skepnur með skeinuhætt öskur)
4. Mikil hæð (allt yfir tveimur metrum)
5. Sigríði Klingenberg galdrakonu

Athugasemdir

[Þórhildur (IP-tala skráð) 3.8.2008 kl. 21:21]

Hehe, skil þetta með lofthræðsluna og Sigríði Klingenberg. Lofthræðslan ágerðist líka hjá mér með árunum en er svona aðeins að ná tökum á henni eftir að ég fór að verða fjarsýn.....hef svo sem ekki hugmynd um hvort það er eitthvað samband á milli þess hve vel maður sér og lofthræðslu. Kannski er þetta bara tilviljun. hmm.

Var einu sinni stödd í verslun og var næst á eftir Sigríði í röðinni við kassann. Maður varð bara hálf feiminn og vandræðalegur og ég hafði sterklega á tilfinningunni að hún gæti lesið hugsanir mínar eða eitthvað í þá áttina. Fannst þetta líka svona hálf skrýtið að líða eitthvað furðulega við að komast svona í tæri við hana, ég, harðfullorðin manneskjan. :) Held það skorti eitthvað á sjálfsöryggið þegar manni líður svona.

[Óskar Jóh. (IP-tala skráð) 4.8.2008 kl. 09:41]

Dæmalaust skemmtilegur lestur! Kannast þó ekkert við nr. 2,3 og 5 valdi mér ótta. 1 og 4 er hvoru tveggja hrikalega óttalegt. Tannlæknar eru skaðræðisskepnur, tannlæknastofur eiga ekki að vera í þéttbýli svo ekki sé minnst á lyktina sem veldur yfirliði. Lofthræðsla er furðulegt fyirbæri. Á landi reyni ég t.d. ávallt að vera í þunnbotna skóm og forðast að horfa upp fyrir mig nema brýna nauðsyn beri til. Ég t.d. nýt ekki útsýnis nema frá alöruggustustöðum og helst í för með fólki sem ég treysti. En það sem gerir lofthræðsluna svo furðulega í mínum huga er að ef ég er kominn í flugvél þá finn ég ekkert fyrir henni og hef meira að segja horft út um opnar dyr og var sallarólegur.

p.s. Ég veit ekki nema Sigríður Klingenberg hefði gert þér greiða ef hún hefði haft tök á að breyta þér í kommúnista. Af tvennu illu held ég að það sé miklu betra en að vera framsóknarmaður ;) 

[Karl Hreiðarsson, 8.8.2008 kl. 22:34]

Þakka hlý orð Óskar!  Kannast við þetta með flugvélar og lofthræðslu!  Ligg á gluggum flugvéla og mæni á landslagið en læt mér ekki detta í hug að gera hið sama í lyftum sem eru með gleri.  Hverjum datt annars sú pynting í hug, lyftur með gleri?  Líklega ættað frá forverum Guantanamo.

[Snæþór Sigurbjörn Halldórsson, 9.8.2008 kl. 14:45]

Kalli.... værirðu til í að blogga, þetta er svo mikill viðbjóður þessi munnur þarna að allar þær google myndir sem þú hefur fengið sendar frá mér eru hjóm eitt við hliðina á þessu gapandi munnholi.

 Já og svo er ég ekki frá því að það vanti þarna inn lið nr. 6 en það er auðvitað konur frá Eystrasaltsríkjunum.

[Karl Hreiðarsson, 12.8.2008 kl. 19:11]

Þakka þér fyrir Inga og vertu velkomin!  Þú varst óheppin að missa af Mærudögunum, hefðir verði stolt af litla bróður en þau Gunna eiga mikið hrós skilið. 

Snæþór: þú átt skilið að horfa á þessa skelfilegu mynd aðeins lengur þannig að ég ætla að bíða aðeins með blogg, eingöngu fyrir þig!

[Snæþór Sigurbjörn Halldórsson, 14.8.2008 kl. 09:22]

Kalli...... kýr****a